“Neftçi” hakim qərarları ilə bağlı bəyanat yaydı

AFFA Hakimlər Komitəsinin sədri Rəhim Həsənov Misli Premyer Liqasının XXVIII turu çərçivəsində keçirilən oyunlarda baş verən mübahisəli epizodlara münasibət bildirib.

Sport1.az xəbər verir ki, mütəxəssis “Zirə” – “Neftçi” qarşılaşmasının baş hakimi İnqilab Məmmədovun yanlış qərar verdiyini açıqlayıb.

“Ağ-qaralar” bununla bağlı bəyanat yayıb:

“Misli Premyer Liqasının 28-ci turu çərçivəsində keçirilən “Zirə” – “Neftçi” qarşılaşması ərzində, xüsusilə də son dəqiqələrdə komandamız yenidən hakim səhvləri ilə üzləşdi. Oyunun 90+4-cü dəqiqəsində “Zirə”nin vurduğu qol qaydaların kobud şəkildə pozulması ilə qeydə alındı. Belə ki, rəqib komandanın futbolçusu Ruan Renatonun oyundankənar vəziyyətdə olmasına və qapıçımız Kenan Piriçin görmə bucağını məhdudlaşdırmasına baxmayaraq, baş hakim tərəfindən qol hesab edildi. VAR-da əyləşən Nicat İsmayıllı isə epizoda müdaxilə etmədi.

Bu səhv mövsümün həlledici mərhələsində “Neftçi”nin növbəti ədalətsiz xal itkisi ilə üzləşməsinə səbəb oldu. Eyni zamanda, qoldan sonra hər iki komandanın futbolçuları arasında yaranan gərginlik fonunda baş verən hadisələr nəticəsində baş məşqçi Yuri Vernidub, onun köməkçisi Dmitro Kara-Mustafa və futbolçu Breno Almeydaya əsassız qırmızı vərəqələr göstərildi.

20.04.2026 tarixində AFFA-nın inzibati binasında “Neftçi” PFK-nın rəhbərliyi və nümayəndələri AFFA rəsmiləri və Hakimlər Komitəsinin sədri ilə görüş keçirib. Görüş zamanı klub sözügedən oyunda qeydə alınan qola etirazını bildirib, həmçinin məşqçilər və futbolçuya göstərilən qırmızı vərəqələrin ləğvini tələb edib.

Bundan əlavə, mövsüm ərzində dəfələrlə təkrarlanan kobud hakim səhvləri sərt şəkildə tənqid olunub və bəzi hakimlərin “Neftçi”yə qarşı ədalətsiz və qərəzli mövqe sərgilədiyi vurğulanıb. Klub nümayəndələri qəbul edilən qərarların əsaslandırılmasını tələb edib. Hakimlər Komitəsinin sədri tərəfindən verilən cavablar klub rəsmilərini qismən qane edib.

Hakimlər Komitəsinin 20.04.2026 tarixli qərarı ilə oyunun hakimlərinin açıq-aşkar kobud səhvə yol verdiyinin etiraf olunması müsbət addım kimi qiymətləndirilib. Bununla belə, qeyd olunub ki, itirilən xallar geri qaytarılmır və bu cür hallar mövsüm ərzində ilk dəfə baş vermir.

Bəyanatda vurğulanır ki, “Neftçi”yə qarşı təkrarlanan kobud səhvlər bəzi hakimlərin komandaya qarşı qərəzli münasibəti ilə əlaqələndirilir və günahkarların ciddi şəkildə cəzalandırılması tələb olunur.

“Neftçi” PFK olaraq aşağıdakılar bəyan edilib:

1. Komandaya qarşı məqsədyönlü və qərəzli hakim ədalətsizliyinə son qoyulmalıdır;

2. Bu cür kampaniyaların nəticə verməyəcəyi bildirilir və klub sona qədər mübarizə aparacağını bəyan edir;

3. Klub üçün azarkeş dəstəyi əsas güc mənbəyi kimi qeyd olunur;

4. “Neftçi”nin Azərbaycan futbolunun flaqmanı olduğu və bu statusunu qoruyacağı vurğulanır.