Xorxe Silva: “İddiamızı sona qədər davam etdirəcəyik!”  – AÇIQLAMA

“İmişli" kimi komandalara qarşı oynamaq hər zaman çətindir”

Bu sözləri Sport1.az-a açıqlamasında “Turan-Tovuz”un üzvü Xorxe Silva Misli Premyer Liqasının 26-cı turunda “İmişli” ilə 1:1 hesablı heç-heçədən sonra dedi.

Futbolçu əvvəlcə qarşılaşma ilə bağlı fikirlərini bölüşdü:

“Müdafiə tipli oynayan rəqiblərə qarşı oyunlar ağır keçir. Qarşılaşmada nələri səhv və nələri düzgün etdiyimizi analiz etməliyik. Bunun üzərində işləyib daha yaxşı olmağa çalışacağıq.”

Müdafiəçi avroliqa şansları və barədə də danışdı:

“Belə komandalar çoxdur və bu cür oyunlara hazır olmalıyıq. Əsas məsələ öz oyunumuzu inkişaf etdirməkdir. Daha yaxşı olmağa davam etsək, istədiyimiz nəticələri əldə edə bilərik.”

Silva “Zirə” ilə kubok oyunundakı məğlubiyyətə də toxunub və revanş şanslarını dəyərləndirdi:

“Hazırda komanda həmin matça fokuslanıb. Düşünürəm ki, ikinci oyunda daha yaxşı çıxış edə bilərik. Amma ilk növbədə çempionat oyunlarına köklənmişik. Sonra kubok matçına hazırlaşacağıq. Futbolda hər şey mümkündür.”

Təcrübəli oyunçu qarşıdakı çətin oyunlar və komandanın hədəfləri barədə də danışdı:

“Hazırda turnir cədvəlində 3-cü pillədəyik və bu mövqeni qorumağa çalışacağıq. Qarşıda çətin oyunlar var, amma matçdan maça daha yaxşı olmağa çalışırıq. İddiamızı sona qədər davam etdirəcəyik.”

MƏHƏMMƏD HÜSEYNOV