Vüsal İsgəndərli: "Danışmağa çox şey yoxdur"

"FIFA Series - 2026" beynəlxalq turnirinfə Azərbaycan Sent Lüsiyanı darmadağın etdi - 6:1.

Qarşılaşmadan sonra millimizin üzvü Vüsal İsgəndərli Sport1.az-a açıqlama verdi. 

Yarımmüdafiəçi hər rəqibə ciddi yanaşmağın vacib olduğunu bildirdi:

"Bütün komandalara hörmətlə yanaşmalı və hər oyuna maksimum ciddi çıxmalıyıq. Uzun müddətdir qələbə qazana bilmirdik. Bu nəticə bizim üçün çox vacib idi. İndi əsas məqsəd uğurun davamını gətirmək, rəqibdən asılı olmayaraq hər oyuna qələbə üçün çıxmaq və bu tempi qorumaqdır.”

Futbolçu qarşılaşma ilə bağlı fikirlərini də bölüşdü:

“Əslində, danışmağa çox şey yoxdur. Rəqib meydana çıxdı, biz də öz oyunumuzu göstərməyə çalışdıq. Qarşılaşma kifayət qədər gərgin keçdi. İkinci hissədə yağan güclü yağış meydançanı demək olar ki, bataqlığa çevirmişdi. Buna baxmayaraq, komanda tapşırıqları yerinə yetirməyə çalışdı.”

O, heyətdə rotasiyanın aparıldığını və bütün oyunçulara şans verildiyini qeyd etdi:

“Əksər futbolçular 45 dəqiqə oynadı və ümumilikdə rotasiya baxımından hamı şans qazandı. Ən önəmlisi odur ki, matçda 6 dəfə fərqlənərək, qələbə qazandıq.”

MƏHƏMMƏD HÜSEYNOV