"Qarabağ" hara gedirsə, orada futbol bayramı olur - YAZI
Dünyanın hər yerində belədir. Bəzi komandalar var ki, onların başqa şəhərə, qəsəbəyə gəlişi adi futbol hadisəsi kimi qarşılanmır. Stadionda sadəcə oyun izlənilmir, bir bayram ab-havası yaranır, şəhər canlanır, tribunalar başqa cür nəfəs alır.
Azərbaycanda bunu yavaş-yavaş görməyə başlayırıq. "Qarabağ" hara gedirsə, orada futbol bayramı olur.
Misli Premyer Liqasının 25-ci turunda Yevlaxda yaşanan mənzərə bunu bir daha göstərdi. Stadiondan oyunu 5000 adam izləyirdi. Bu, təsadüfi nəticə deyildi. Mövsüm ərzində ikinci dəfə bölgədə Ağdam təmsilçisinin oyununda belə anşlaq yaşanırdı. Qubada keçirilən "İmişli" - "Qarabağ" matçında da belə izdiham var idi.
Qubalıları anlamaq olar. Premyer Liqada komandaları yoxdur. Amma Yevlax futbol şəhəridir. “Karvan-Yevlax” Premyer Liqa matçlarını öz evində keçirir. Amma etiraf etmək lazımdır ki, əvvəlki qarşılaşmalarda stadionda belə böyük izdiham yaşanmamışdı. Hətta şəhərin komandası üçün vacib hesab olunan başqa oyunlara da bu səviyyədə maraq olmamışdı.
Bu, artıq başqa məsələdir. Burada söhbət “Qarabağ”a olan sevgisindən gedir. Ağdam təmsilçisi hansı rayona yollanırsa, orada bu komandaya qarşı xüsusi münasibət hiss olunur. Daha əvvəl Qubada da eyni mənzərənin şahidi olmuşduq. Həmin vaxt da açıq görünürdü ki, tribunaya gələnlər məhz “köhlən atlar”a dəstək olurdular.
Bu sevgi boş yerdən yaranmayıb. İllərdir ölkə futbolunda sabitlik göstərən, avrokuboklarda Azərbaycanı layiqincə təmsil edən, çempionluq vərdişini adiləşdirən komanda təbii olaraq bölgələrdə də özünə böyük auditoriya formalaşdırmalı idi. İnsanlar uğur qazanan kollektivə maraq göstərə bilər. Amma hər uğurlu kluba bu qədər isti münasibət olmur. Burada başqa bir bağ da var. Bu komanda artıq çoxları üçün sadəcə klub deyil, futbolun özü ilə bağlı hisslərin daşıyıcısına çevrilib.
Yevlaxdakı mənzərəni daha da xüsusi edən başqa bir məqam isə təqvimlə bağlı idi. Dünən Azərbaycanda həm Novruz, həm də Ramazan bayramı qeyd olunur. Belə bir gündə “Qarabağ”ın rayona səfəri yevlaxlılar üçün bayrama bayram qatdı. İnsanlar sadəcə oyuna yox, bir növ futbol şənliyinə gəlmişdilər. Tribunadakı coşqudan bunu hiss etmək olurdu. Sanki şəhərdə təkcə matç yox, ümumi bayram ovqatının bir parçası yaşanırdı.
Futbolun ən gözəl tərəfi də budur. Bəzən bir komandanın səfəri təkcə 90 dəqiqəlik qarşılaşma olmur. O, bir şəhərin gününü dəyişir, insanları stadion ətrafında birləşdirir, uşaqlara yeni xatirə yaşadır, böyüklərə isə köhnə futbol hisslərini qaytarır. Yevlaxda baş verən də məhz bu idi.
Bu gün artıq rahat demək olar ki, “Qarabağ” sevgisi yalnız Ağdamla məhdudlaşmır. Bu dəyər ölkənin müxtəlif bölgələrinə yayılıb. Qubada da bunu gördük, Yevlaxda da bir daha şahidi olduq. Sabah başqa rayonda oynasa, böyük ehtimalla yenə eyni mənzərə yaranacaq. Hələ "Qarabağ" Ağdama qayıdandan sonra komandaya olan sevgi tam başqa səviyyəyə çatacaq.
Yevlaxda tribunaların dolması adi azarkeş marağı deyildi. Bu, ölkə boyu yaşayan “Qarabağ” sevgisinin növbəti nümayişi idi.
ZƏFƏR HACILI
