Andrey Demçenko: "İkinci hissə xoş təsir bağışlamadı"
"Araz-Naxçıvan" Misli Premyer Liqasının 25-ci turunda səfərdə "Şamaxı"yı 1:0 hesabı ilə qalib gəlib.
Sport1.az xəbər verir ki, "Araz-Naxçıvan"ın baş məşqçisi Andrey Demçenko oyundan sonra keçirilən mətbuat konfransında jurnalistlərin suallarını cavablandırıb:
"Bizim qarşımıza qoyulan məqsəd son iki oyunda 6 xal qazanmaq idi və buna nail olduq. Komandanı bu tapşırığın öhdəsindən gəldiyi üçün təbrik edirəm. Oyun məndə qarışıq təəssüratlar oyatdı. Birinci hissədə təşəbbüsə sahib idik, qol imkanları yaratdıq. Amma ikinci hissə xoş təsir bağışlamadı. Rəqib uzun ötürmələrə üstünlük verdi və bizdə müəyyən problemlər yarandı. Matçın sonunda qol buraxıb heç-heçə də edə bilərdik. Bununla belə, müdafiədə yaxşı oynadıq və rəqibin yüzfaizlik epizodlarda fərqlənməsinə imkan vermədik. Komandanın formalaşması üçün belə görüşlərdə qələbə vacibdir.
Qarşıda üç çətin oyun olduğunu nəzərə alsaq, fasilədən necə istifadə etməyi planlaşdırırsınız?
Uşaqlara üç-dörd gün istirahət verəcəyik. Bundan sonra hazırlaşmaq üçün vaxt olacaq. Qarşıda "Sabah" və "Neftçi" ilə çətin oyunlarımız var. Bunlar çox güclü komandalardır. Bu müddət ərzində mübarizə aparmaq üçün hazırlaşmalıyıq. Həmçinin bir yoldaşlıq oyunu keçirməyi planlaşdırırıq.
