AFFA daha bir stadionu təmir edəcək – RƏSMİ AÇIQLAMA

Azərbaycanda daha bir stadion təmir olunacaq.  

Redaksiyamıza daxil olan məlumata görə, I Liqa təmsilçisi “Səbail”in ev oyunlarını keçirdiyi “Bayıl Arena” yaxın zamanda yenilənmə işləri üçün bağlanacaq.   

Məsələni dəqiqləşdirmək və arenada planlaşdırılan yeniliklərlə bağlı məlumat almaq üçün AFFA-nın mətbuat katibi Murad Axundova müraciət etdik.  

Qurum rəsmisi Sport1.az-a açıqlamasında stadionda əsaslı işlərin planlaşdırıldığını bildirdi:  

“Mayın ikinci yarısında “Bayıl Arena”nın əsaslı təmirə bağlanması nəzərdə tutulub. Stadionda bir neçə istiqamətdə yenilənmə işləri aparılacaq. Ot örtüyünün dəyişdirilməsi planlaşdırılır. Bununla yanaşı, inzibati binada təmir işləri görüləcək. İşıqlandırma sistemi də yenilənəcək. Həmçinin stadionun qazanxanasında təmir işlərinin aparılması nəzərdə tutulub”.  

ZƏFƏR HACILI