"Qarabağ"dan ayrılan futbolçu: "Onunla danışanda ilk dediyi söz bu oldu"

“Qarabağ”dan ayrılan Kris Kuaku Norveçin “Sarpsborg 08” klubuna transferi barədə fikirlərini açıqlayıb.

Sport1.az xəbər verir ki, 26 yaşlı yarımmüdafiəçi klubun rəsmi saytına açıqlamasında yeni komandasında çıxış edəcəyinə görə qürurlu olduğunu bildirib. O, komandanın uğuru üçün əlindən gələni etməyə çalışacağını vurğulayıb.

Kuaku əsasən mərkəz yarımmüdafiəçisi mövqeyində oynadığını deyib: “Topu müdafiədən hücuma aparmağı xoşlayıram. “Altı” və ya “səkkiz” nömrə mövqeyində çıxış edə bilirəm. Müdafiəyə kömək etməyi, eyni zamanda hücumlara qoşulmağı sevirəm”.

Futbolçu qeyd edib ki, bu kluba keçməzdən əvvəl sabiq komanda yoldaşı Andreas Nibe ilə danışıb. Onlar daha əvvəl Portuqaliyanın “CD Mafra” klubunda birlikdə oynayıblar.

“Onunla danışanda ilk dediyi söz bu oldu ki, burada hamı sənin daha yaxşı futbolçu olmağın üçün kömək edəcək. Komanda da kifayət qədər ambisiyalıdır. “Sarpsborg” inkişaf etməyi və irəli addımlamağı hədəfləyən klubdur”.

Sonda yarımmüdafiəçi əlavə edib: “Çox xoşbəxt və qürurluyam. Özümü göstərmək üçün səbirsizlənirəm. Meydanda komandaya çox enerji vermək istəyirəm. Özüm barədə çox danışmağı sevmirəm, qoy insanlar məni meydanda görsünlər”.