Klopp üçün yeni ünvan Almaniya millisi ola bilər
Yurgen Kloppun gələcək karyerası ilə bağlı yeni iddialar ortaya çıxıb.
Sport1.az Almaniya mətbuatına istinadən xəbər verir ki, təcrübəli mütəxəssis 2026-cı ildə keçiriləcək dünya çempionatından sonra yığmanın baş məşqçisi postuna gətirilə bilər.
Hazırda Bundestimə Yulian Nagelsmann rəhbərlik edir. Lakin komandanın mundialdakı nəticələri gözləntiləri doğrultmasa, onun vəzifədə qalması sual altına düşə bilər.
Almaniya yığması 2014-cü ildə dünya çempionu olsa da, son iki mundialda uğursuz çıxış edib. Komanda həm 2018, həm də 2022-ci il turnirlərində qrup mərhələsini keçə bilməyib.
Qeyd olunur ki, hazırda “Red Bull” strukturunda qlobal futbol rəhbəri kimi çalışan Yurgen Kloppun yenidən məşqçilik fəaliyyətinə qayıtması mümkündür. Bildirilir ki, şirkət bu yay onun texniki zona üçün təklif almasına mane olmayacaq.
Məlumata görə, son həftələrdə Kloppla “Real Madrid” də maraqlanıb.
