"Qarabağ"dan "bu kəndin ağası mənəm" ismarıcı – YAZI

Futbolda bəzi vacib qələbələr var ki, dəyəri 3 xaldan daha çoxdur. Bəzən rəqiblərə, bəzən rəsmilərə, bəzən azarkeşlərə, bəzən də hamıya bir mesaj vermək istəyirsən: “Mən buradayam”. “Qarabağ”ın “Araz-Naxçıvan” üzərində qazandığı 6:0 hesablı qələbə də məhz belələrindən idi.

Ağdam təmsilçisi bu oyunda sadəcə qalib gəlmədi. “Köhlən atlar” sanki hamıya göstərdi ki, çempionluq yarışı hələ bitməyib. Bu kəndin ağası yenə mənəm.

Bəli, hazırda turnir cədvəlinin zirvəsində “Sabah” qərarlaşıb. “Bayquşlar” stabil nəticələr hesabına liderliyi ələ keçiriblər. Amma bu mənzərənin incə tərəfi var. “Qarabağ” bir oyun az keçirib. Həmin matç Çempionlar Liqasına görə təxirə salınmış “Neftçi” ilə qarşılaşmadır. Yəni, cədvəldə görünən fərq tam mənzərəni əks etdirmir.

Son aylarda “Qarabağ” paralel olaraq Avropa arenasında mübarizə aparırdı. Çempionlar Liqasının gərgin qrafiki Premyer Liqaya tam fokuslanmağa imkan vermirdi. “Nyukasl”la oynanan oyunlar, səfərlər, bərpa prosesi...

Bütün bunlar daxili çempionata istər-istəməz təsir edirdi. İndi isə vəziyyət dəyişib.

“Qarabağ” artıq 1/16 final mərhələsində mübarizəni dayandırıb və bundan sonra bütün diqqət Premyer Liqaya yönələcək. Bu isə rəqiblər üçün o qədər də xoş xəbər deyil. Çünki Avropadan qayıdan “köhlən atlar” adətən çempionata daha aqressiv başlayır. “Araz-Naxçıvan”la oyunda bunun tam şahidi olduq. Bu, adi darmadağın deyildi. Çempionluq yarışının yeni mərhələsinin başladığını göstərən siqnal idi.

ZƏFƏR HACILI