Messi Ağ Evdə Trampla görüşəcək

“İnter Mayami” MLS pley-offunun qalibi olduqdan sonra ABŞ prezidenti Donald Tramp ilə rəsmi görüşə hazırlaşır.

Sport1.az  xəbər verir ki, bu haqda “The Athletic” məlumat yayıb. Bildirilib ki, görüşün gələn həftə keçirilməsi planlaşdırılır. Bu səfər baş tutacağı halda komandanın hücumçusu Lionel Messi üçün həm Ağ Evə ilk səfər, həm də Trampla ilk görüş olacaq.

Messinin nümayəndəsi argentinalı futbolçunun komanda ilə birlikdə görüşə qatılıb-qatılmayacağını təsdiqləməyib. Bununla belə, səfərin martın 7-də keçiriləcək “Di Si Yunayted”lə matçdan əvvəl baş tutmasının planlaşdırıldığı bildirilib.

Qeyd olunur ki, Messi “Ağ Ev”ə yollanacağı halda bu, onun “İnter Mayami”nin futbolçusu kimi ilk rəsmi səfəri olacaq. Səkkizqat “Qızıl top” mükafatçısı 2025-ci ilin yanvarında sabiq ABŞ prezidenti Co Bayden tərəfindən Prezident Azadlıq medalı almaq üçün dəvət edilsə də, mərasimdə iştirak edə bilməmişdi.

Xatırladaq ki, 2025-ci ilin noyabrında “İnter Mayami” finalda “Vankuver Uaytkaps”ı məğlub edərək MLS Kubokunu qazanıb. Bu, klubun 2020-ci ildə liqaya qoşulduqdan sonra ilk çempionluğu olub. Messi isə ABŞ təmsilçisinə 2023-cü ilin yayında transfer olunub.