Koxalskidən Eddi Hauya mesaj

“Qarabağ”ın qapıçısı Mateuş Koxalski UEFA Çempionlar Liqasının pley-off mərhələsində “Nyukasl”la keçirilən oyunlardan sonra İngiltərədə çıxış etmək istədiyini gizlətməyib.

Sport1.az xarici mətbuata istinadən xəbər verir ki, 25 yaşlı polşalı qolkiper Premyer Liqa və ya Çempionşipdə oynamağın onun üçün əsas hədəflərdən biri olduğunu bildirib.

Koxalski İngiltərəyə mümkün keçidi ilə bağlı açıqlamasında arzusunu belə ifadə edib:

“Bu, mənim ən böyük arzumdur. Ümid edirəm ki, həmin matçları yalnız azarkeşlər yox, skautlar da izləyiblər. Haqqımda müsbət fikir formalaşıbsa, gələcəkdə bunun real təklifə çevrilməsini istərdim”.

Qolkiper iki oyunda buraxdığı qolların onu qane etmədiyini də vurğulayıb:

“Həmişə komandama maksimum kömək etməyə çalışıram. Bu iki qarşılaşmada 9 qol buraxmışıq və təbii ki, bundan razı qala bilmərəm. Altı qol buraxdığın oyunu uğurlu saymaq mümkün deyil”.

Xatırladaq ki, Ağdam təmsilçisi Bakıda 1:6, səfərdə isə 2:3 hesabı ilə məğlub olub. Bununla belə, Koxalski hər iki matçda bir sıra çətin zərbələrin qarşısını alaraq diqqət çəkib. O, hazırda Çempionlar Liqasının bu mövsümündə ən çox qurtarış edən üçüncü qapıçıdır – hesabında 45 seyv var.