Meksika prezidenti: “DÇ-2026 üçün bütün təminatlar var”
Meksika prezidenti Klaudiya Şeynbaum 2026-cı il dünya çempionatı ərəfəsində ölkədə təhlükəsizliklə bağlı təminat verib.
Sport1.az xəbər verir ki, “Reuters” agentliyinin məlumatına görə, dövlət başçısı ölkənin mundial oyunlarını qəbul etmək üçün bütün zəruri şəraiti yaratdığını bildirib. O, turnir zamanı azarkeşlər üçün heç bir risk görmədiyini vurğulayıb və təhlükəsizlik məsələlərinin tam nəzarətdə olacağını qeyd edib.
Xatırladaq ki, bazar günü Meksika Silahlı Qüvvələrinin keçirdiyi xüsusi əməliyyat zamanı ölkənin ən iri narkokartellərindən biri olan “Yeni Nəsil Xalisko” (CJNG) qruplaşmasının lideri Nemesio Oseqera (El Menço) zərərsizləşdirilib. Bundan sonra bir neçə şəhərdə iğtişaşlar qeydə alınıb.
Qeyd edək ki, 2026-cı il dünya çempionatı 11 iyun – 19 iyul tarixlərində ABŞ, Meksika və Kanadada keçiriləcək. Meksikada oyunlar Mexiko, Monterrey və Qvadalaxara şəhərlərində baş tutacaq.
