Qurban Qurbanov 1:6 hesablı məğlubiyyətin səbəbini AÇIQLADI: "Bu futbolçularımı nokauta saldı"

Çempionlar Liqasının pley-off mərhələsinin ilk oyununda "Qarabağ" "Nyukasl"a 1:6 hesabı ilə uduzdu.

Sport1.az xəbər verir ki, görüşdən sonra Ağdam təsmilçisinin baş məşqçisi mətbuat konfransında iştirak etdi. Mütəxəssis məğlubiyyəti şərh etdikdən sonra jurnalistlərin suallarını cavablandırdı:

“Əfsuslar olsun ki, məğlub olduq. Doğma meydanda uduzmaq istəməzdik. Amma bu, futboldur. Belə nəticələr olur. Çempionlar Liqası fərqli səviyyədir. Böyükhesablı nəticələr qaçınılmazdır. İlk qol, ardınca penalti futbolçularımı nokauta saldı. Özlərini ələ ala bilmədilər. Bu, rəqibin də gücünü göstərirdi. Demişdim ki, “Nyukasl” çox sürətli, taktiki və texniki hazırlığı olan komandadır. Azarkeşlərimizə təşəkkür etmək istəyirəm. Böyük futbolun nə olduğu həm Liverpulda, həm də burada hiss etdik. İrəli baxmalı, daha ciddi hazırlaşmalıyıq. Futbolçularımız fevral ayına qədər azarkeşlərə Çempionlar Liqası həyəcanı yaşatmağı bacardılar. Futbol ölkədə daha da məşhurlaşdı. Məğlubiyyətlə barışmalı, rəqibi təbrik etməliyik. Bu qələbəyə layiq idilər".

- Fasilədə futbolçulara nə dediniz? Bədavi Hüseynovu meydana buraxdınız…

- ⁠Tək fikrim onları sakitləşdirmək oldu. Yanlarında olduğumu bildirdim. Sakitləşməsək, hesab daha böyük ola bilərdi. Rəqibin gücünü bilirdik. Bədavinin əvəzetməsi müdafiəyə atılan addım idi. O da inamlı çıxış etdi. 

- Çempionat oyunlarına görə rotasiyaya gedəcəksinizmi?

- ⁠Belə bir fikrimiz yoxdur. 3-4 məşq birlikdə ola biləcəyik. Qarşımızda səhvləri bağışlamayan, qol vurmaq istəyən rəqib var. Ciddi rotasiyalar haqda düşünməyəcəyik.

- Bəhlul Mustafazadənin zədəsi nə qədər ciddidir?

- ⁠Hələ ki, xəbər yoxdur. Sabah bəlli olacaq. Əzələ dartılması gözlənilir.

- Komandanın üzərində “qara buludlar” var. Bu, pley-offun eyforiyasıdır, yoxsa gücün tükənişi?

- ⁠Bəzən fikirlərim özümüzü sığortalamaq kimi səslənə bilər. Amma qəbul etməliyik ki, hər səviyyədə rəqib daha da güclənir. Pley-offda bizi məğlub etsələr, 16 ən yaxşı komandadan biri olacaqlar. Onlarla oynamaq riskdir. Böyükhesablı məğlubiyyətlər ala bilərik. Amma ölkə futbolu üçün özümüzü qurban verməyə hazır olmalıyıq. Bu, təkcə bizim üçün yox, hamımız üçün eynidir. Qarşıda bizi nələrin gözlədiyini, dünya futbolunun inkişafını görmək faydalıdır. Bu gün bir daha şahidi oldum. Əvvəllər azarkeşlər 0:3 hesabı olanda meydanı tərk edirdilər, amma bu gün fərqli idi. Artıq onlar da bu səviyyənin fərqli olduğunu bilirdilər. Hamımız üçün gözəl təcrübə oldu.

- “Nyukasl”ın pressinqinə qarşı oyun planınız nə idi? 

- ⁠Belə oyunlarda dəyişiklik etməyə vaxtımız yoxdur. Yeni taktika üçün azı 3-4 dəfə bunu məşqlərdə yoxlamalıyıq. Bacardığımızı daha da yaxşılaşdırmaq üçün çalışırıq. Rəqibin hər hücumu keyfiyyətli idi. İkinci hissədə fərqli oynadıq. Amma futbolçularımızda həyəcan var idi.