Vinsent komandanın durumunu dəyərləndirdi

Azərbaycan Basketbol Liqasında çıxış edən “Sərhədçi”nin basketbolçusu Ceymond Vinsent klubun mətbuat xidmətinə danışıb.

Sport1.az həmin müsahibəni təqdim edir:

– Komanda son oyunda qələbə qazandı. Sizcə, bu qələbə komanda üçün nə dərəcədə önəmlidir?

– Bu qələbə bizim üçün çox vacib idi. Hazırda üçüncü yer uğrunda mübarizə aparırıq. Buna görə də bu, bizim üçün böyük və dəyərli qələbə oldu.

– Ümumilikdə “Sərhədçi”nin çıxışını necə qiymətləndirirsiniz?

– Açığı, çıxışımız pis deyil. Amma komanda olaraq birlikdə inkişaf etdirməli olduğumuz çox məqamlar var. Hələ də üzərində işləməli olduğumuz sahələr kifayət qədərdir.

– Oyunun ən yaxşı oyunçusu seçildiniz. Bu barədə fikirləriniz necədir?

– Buna görə minnətdaram. Amma ilk növbədə komanda yoldaşlarıma və məşqçilərimə təşəkkür etməliyəm. Onların mənə olan etimadı olmasa, bu mümkün olmazdı.

– “Sərhədçi” qarşısına qoyduğu hədəflərə çata biləcəkmi?

– İnanıram ki, çox çalışsaq və intizamlı olsaq, məqsədimizə çatacağıq.

– Azərbaycanda özünüzü necə hiss edirsiniz? Burada qalmaq və davam etmək istərdinizmi?

– Azərbaycanı bəyənirəm, çox maraqlı ölkədir. Burada davam etmək ehtimalım da var.

– Kubok oyunları ilə əlaqədar fasilə olacaq. Bu fasilədən necə yararlanacaqsınız?

– Bu vaxtdan maksimum istifadə etməyə çalışacağıq. Zalda məşqlərimizi davam etdirəcəyik və oyunumuzu daha da inkişaf etdirmək üçün çalışacağıq ki, daha yaxşı olaq.