İrəhimin gəlsin, Rəhim Həsənov – YAZI

Qoy gülüm gəlsin, ay nənə,

Qoy yarımm gəlsin, ay nənə,

Qapıda duran oğlana,

İrəhimin gəlsin nənə…

Rəhim Həsənov Hakimlər Komitəsinin sədri vəzifəsinə gəldiyi gündən referilərin səhvlərini açıq şəkildə göstərir, epizodlara toxunur, ictimaiyyətə məlumat verir. Bu, gözəl və alqışlanası addımdır. Amma ortada konkret cəza yoxdur.

Bu vəziyyət istər-istəməz xalq ədəbiyyatındakı o misraları xatırladır. Sanki hər dəfə deyilir, danışılır, amma nəticə dəyişmir.

Misli Premyer Liqasının son turunda keçirilən “Araz-Naxçıvan” – “Sumqayıt” və “Kəpəz” – “Neftçi” oyunlarında ciddi müzakirə doğuran epizodlar oldu. Üstəlik, həmin epizodlarda VAR hakimləri də prosesə qoşuldu, referiləri monitor qarşısına çağırdı və qərarların dəyişməsində rol oynadı. Yəni bu, təkcə meydandakı hakimin ani səhvi deyil, videoya baxıldıqdan sonra verilmiş qərarlardır.

Referiləri müəyyən qədər başa düşmək olar. Təzyiq olur, mövqe uyğun olmur, hadisələr ani baş verir. Amma VAR müdaxiləsi ilə baxılan epizodlarda da səhv qərar çıxırsa, buna baxmayaraq heç bir intizam tədbiri görülmürsə, burada artıq ciddi suallar yaranır. Hakimlər toxunulmazdır?

Buradan Rəhim Həsənova bir sual ünvanlamaq istəyirəm: “Sumqayıt” mövsümün sonunda cəmi 3 xal fərqi ilə avrokuboklara vəsiqə qazanmasa, necə olacaq? Komandanın əziyyətini niyə yerə vurursunuz?

Düzdür, "Neftçi" qalib gəldi. Amma penaltidən sonra Bakı təmsilçisinin oyunu alınmasaydı, necə olacaqdı? "Neftçi"nin haqqı niyə yeyilir?

Səhvlər deyilir, açıqlamalar verilir, amma cəza tətbiq olunmur. Bəs onda ədalət necə təmin olunur? Mövsümün taleyinə təsir edən qərarların məsuliyyəti kimdədir?

Haqqı yeyilən komandalara irəhiminiz gəlsin, Rəhim Həsənov…

MƏHƏMMƏD HÜSEYNOV