Şamaxı olmasa, AFFA və PFL nə edər? - YAZI

I Liqada 10 komandanın mübarizə apardığı çempionatda 13-cü turun təqvimi diqqətçəkən mənzərə ortaya qoydu.

Həftə ərzində keçirilən 5 oyunun 3-ü eyni məkanda — Şamaxı OİK-də baş tutdu. Bu fakt liqanın təşkilati prinsipləri və peşəkar statusu ilə bağlı ciddi suallar doğurur.

Sözügedən arenada keçirilən oyunlar bunlar olub:

– "Cəbrayıl" – "Ordu" (2:2)
– "Şahdağ Qusar" – "Difai" (4:0)
– "Şimal" – "Mingəçevir" (0:3)

Normal şəraitdə hər klub öz stadionunda oynamaq hüququna və imkanına sahib olmalıdır. “Ev oyunu” anlayışı yalnız təqvimdə yazılan məkanla yox, azarkeş dəstəyi, tanış mühit və yerli futbol atmosferi ilə ölçülür. Şamaxı OİK-də isə bir komandanın matçı bitir, 24 saat keçməmiş digərinin “ev oyunu” başlayır. Bu isə ev-səfər balansını formal hala salır.

Məsələnin digər tərəfi infrastruktur problemidir. I Liqada çıxış edən klubların əksəriyyəti öz meydanlarını təqdim edə bilmirsə, bu, ayrı-ayrı kollektivlərin yox, ümumi futbol idarəçiliyinin problemidir. Bu cür yanaşma həm idman ədalətinə, həm də liqanın imicinə zərər vurur.

I Liqa doğrudan da peşəkar çempionatdırmı, yoxsa hələ də keçid mərhələsində olan turnirdir? Stadion problemi müvəqqətidirsə, bununla bağlı ictimaiyyətə aydın yol xəritəsi təqdim olunmalıdır.

Çünki peşəkar futbolun əsası sadədir: hər komandanın öz meydanı, azarkeşi və ev oyunu olmalıdır. Əks halda, eyni stadionda növbəli şəkildə keçirilən “ev oyunları” liqanın inkişafına deyil, sualların artmasına xidmət edir.

NİHAT KƏRİMLİ