Rossi Azərbaycan Kuboku ilə bağlı hədəfi var - AÇIQLAMA
“Şamaxı” Bizon Azərbaycan Kubokunun 1/4 final mərhələsinin ilk oyununda “Qarabağ”ı 2:1 hesabı ilə məğlub etdi.
“Münəccimlər”in heyətində dubl edən Kərim Rossi görüşdən sonra Sport1.az-a açıqlama verdi. Hücumçu ilk qarşılaşmanın komanda üçün uğurlu keçdiyini bildirdi:
“İlk oyun idi. Bizim üçün yaxşı alındı. Taktiki baxımdan düzgün oynadıq və nəticədən razıyıq. Bilirik ki, “Qarabağ” böyük klubdur. Bu nəticə bizim üçün önəmlidir”.
Forvard rəqibin heyət seçimindən də danışdı:
“Bu oyunda bir qədər fərqli oyunçularla çıxış etdilər. Çempionlar Liqasında az oynayanlara şans verdilər. Bu müəyyən mənada bizim xeyrimizə oldu”.
Rossi vurduğu qolların əhəmiyyətinə də toxundu:
“Bu, kubok oyunudur və vurulan qollar burada hesablanır. Təbii ki, məqsədim ən çox fərqlənənlərdən biri olmaqdır. Bunun üçün əlimdən gələnin ən yaxşısını etməyə çalışıram. Əvvəlki oyunlarda start heyətində meydana çıxmamışdım və kubokda qolum yox idi. Bu matçda əsas heyətdə oynadım və iki qol vurdum. Cavab görüşündə də yaxşı oyun göstərib, mümkün qədər irəliləməyə çalışacağıq”.
Qeyd edək ki, Bizon Azərbaycan Kubokunda 1/4 final mərhələsinin cavab oyunları martın 3-də keçiriləcək.
NİHAT KƏRİMLİ
