Kadi: "Bu, İngiltərə, Braziliyada da belədir”
“Qarabağ” Bizon Azərbaycan Kubokunun 1/4 final mərhələsinin ilk oyununda səfərdə “Şamaxı”ya 1:2 hesabı ilə uduzdu.
Ağdam təmsilçisinin aparıcı futbolçularından Kadi Borges qarşılaşmadan sonra Sport1.az-a açıqlama verdi.
Braziliyalı yarımmüdafiəçi görüşün çətin şəraitdə keçdiyini qeyd etdi:
“Meydançanın vəziyyəti yaxşı deyildi, hava çox soyuq idi və sıx duman səbəbindən görmək çətinləşirdi. Amma bunları bəhanə kimi istifadə edə bilmərik. Düşünürəm ki, bacardığımızın cəmi 20 faizini göstərdik. Futbolda belə hallar olur, lakin indi növbəti oyunlar haqqında düşünməliyik. Bu cür performans ikinci dəfə təkrarlanmamalıdır. Bu şərait yalnız bizə yox, “Şamaxı”ya da təsir edirdi. Açıq şəkildə deməliyik ki, pis oynadıq. Bunu qəbul etməliyik və səhvlərimizi düzəltməliyik”.
Futbolçu komandanın sıx oyun qrafiki ilə bağlı səslənən fikirlərə də münasibət bildirdi:
“Bu, təkcə bizdə deyil. Braziliyada, İngiltərə Premyer Liqasında və digər liqalarda da sıx qrafik olur. Hazırlıq prosesi düzgün qurularsa, problem yaratmamalıdır. Bu dövrdə bərpa çox vacibdir”.
“Köhlən atlar”ın ulduzu son günlərdə gündəm olan "Neftçi" ilə derbi matçı haqqında da danışdı:
“Oyun təxirə salınsa da, salınmasa da, meydana çıxıb oynamalıyıq. Bu derbidir və derbilər hər zaman xüsusi əhəmiyyət daşıyır”.
NİHAT KƏRİMLİ
