DÇ-2026: Yarım milyard azarkeş bilet püşkatmasına qatılıb
2026-cı il Dünya Çempionatının biletləri üçün rekord sayda müraciət qeydə alınıb.
Sport1.az xəbər verir ki, bu barədə FIFA-nın X sosial şəbəkəsindəki rəsmi hesabında məlumat paylaşılıb. Biletlərin alınması ilə bağlı keçirilən püşkatmada iştirak üçün təxminən 500 milyon azarkeş müraciət edib.
Cəmi 33 gün ərzində FIFA-ya quruma üzv olan 211 ölkənin hamısından yüz milyonlarla sifariş daxil olub. Ən çox müraciət ABŞ, Meksika və Kanada ilə yanaşı Almaniya, İngiltərə, Braziliya, İspaniya, Portuqaliya, Argentina və Kolumbiyadan edilib. Azarkeşlər müraciətlərin nəticələri barədə ən tez 5 fevral tarixindən sonra məlumatlandırılacaqlar.
Qeyd edək ki, futbol üzrə Dünya Çempionatı 2026-cı il 11 iyun – 19 iyul tarixlərində ABŞ, Kanada və Meksikada keçiriləcək.
