Musayevi tənqid etdi: “Sabah”da niyə nəticə yox idi?
Rusiya millisinin sabiq futbolçusu Aleksandr Mostovoy “Krasnodar”ın baş məşqçisi Murad Musayevlə bağlı tənqidi fikirlər səsləndirib.
Sport1.az xəbər verir ki, keçmiş yarımmüdafiəçi bu barədə “Sports.ru”ya açıqlamasında danışıb. Mostovoy Rusiya Premyer Liqasında əldə olunan son nəticələr fonunda Musayevin fəaliyyətinə toxunaraq onun Azərbaycandakı işini də xatırladıb. O, mütəxəssisin “Sabah” klubunda çalışdığı dövrdə ciddi uğur qazana bilmədiyini vurğulayıb:
“Musayev Rusiya Premyer Liqasında oktyabr və noyabrın ən yaxşı məşqçisi seçilib. Amma o, Azərbaycana – “Sabah”a gedəndə və yerli çempionatda heç nə əldə etməyəndə niyə bu cür təriflər yox idi?”
Mostovoy həmçinin məşqçilərin rolunun bəzən həddindən artıq qabardıldığını bildirib. Onun fikrincə, titul və uğurların əsas yükü meydandakı futbolçuların üzərinə düşür:
“2013-cü ildə ÇSKA-nın çempionluğunda Slutskının yox, futbolçuların rolu həlledici idi. 2025-ci ildə də “Krasnodar”da eyni mənzərəni gördük – nəticəni qazananlar oyunçular oldu. Futbol mühitində çox vaxt əsas işi görən fiqurlar kölgədə qalır, əldə olunan uğurlar isə məşqçilərin adına yazılır”.
