FIFA DÇ-2026 üçün yeni bilet kateqoriyası təqdim etdi

FIFA 2026-cı il Dünya Çempionatı üçün yeni bilet kateqoriyasını təqdim edib.

Sport1.az xəbər verir ki, qurumun rəsmi saytında yayımlanan məlumata görə, “azarkeş girişi” adlanan yeni kateqoriya üzrə biletlərin qiyməti 60 ABŞ dolları müəyyənləşdirilib. Bu biletlər turnirin bütün 104 oyununa, o cümlədən final matçına şamil olunacaq.

Satış prosesi turnirdə iştirak edən milli assosiasiyalar vasitəsilə həyata keçiriləcək. Hər assosiasiya ən ucuz biletlər üçün müraciət və seçim meyarlarını müstəqil şəkildə müəyyənləşdirəcək. Bildirilir ki, bu biletlərin əsasən yığmalarını daim dəstəkləyən ən sadiq azarkeşlərə ayrılması nəzərdə tutulur.

Qeyd edək ki, FIFA-nın açıqlamasına əsasən, hazırda təsadüfi püşkatma mərhələsində biletlər üçün 20 milyondan çox müraciət qeydə alınıb. Təşkilat həmçinin vurğulayıb ki, Dünya Çempionatından əldə olunan gəlirlər kişi, qadın və gənclər futbolunun inkişafına yönəldiləcək.