Bizon Kubokunda 1/8 final sonrası cəzalar – Kimlərə və niyə?

AFFA İntizam Komitəsi Bizon Azərbaycan Kubokunun 1/8 final mərhələsinin oyunları ilə bağlı qərarlarını açıqlayıb.

Sport1.az xəbər verir ki, “Zirə” – “Neftçi” görüşündə  “ağ-qaralar”ın 4 futbolçusu sarı vərəqə aldığı üçün klub 700 manat cərimələnib. Həmin oyunda “flaqman”ın azarkeşlərinin meydançaya kənar əşyalar atmasına görə 2000 manat, rəqib komandanın ünvanına kütləvi şəkildə təhqiramiz ifadələr səsləndirdiklərinə görə isə əlavə 5000 manat cərimə kəsilib.

“İmişli” – “Sabah” matçında meydan sahiblərinin 4 futbolçusunun sarı vərəqə alması səbəbindən bölgə təmsilçisi 700 manat cərimə olunub. Eyni qarşılaşmada hakimlərə kütləvi şəkildə təhqiramiz ifadələr səsləndirdiklərinə görə “Sabah”ın azarkeşləri səbəbindən paytaxt klubu 5000 manatlıq sanksiya ilə üzləşib.

“Qarabağ” – “Karvan-Yevlax” oyununda qonaq kollektivin 4 futbolçusu sarı vərəqə gördüyü üçün Yevlax təmsilçisi 700 manat cərimə edilib. “Difai” – “Sumqayıt” matçının 83-cü dəqiqəsində meydan sahiblərinin 77 nömrəli futbolçusu Roman Hüseynov ikinci sarıdan qırmızı vərəqə aldığı üçün 1 oyunluq cəzaya məruz qalıb, həmçinin klub 150 manat cərimələnib. “Araz-Naxçıvan” – “Kəpəz” qarşılaşmasında isə Gəncə təmsilçisinin 5 oyunçusunun sarı vərəqə alması səbəbindən qonaqlar 700 manatlıq maliyyə sanksiyası ilə cəzalandırılıb.