"İllər keçdikcə liqalar arasındakı fərq azalır" – AÇIQLAMA

Bizon Azərbaycan Kubokunun 1/8 final mərhələsinin oyunları başa çatdı.

Geriyə qalan turun ardından I Liqa təmsilçiləri ilə Premyer Liqa klublarının arasında bir neçə qarşılaşma baş tutdu.

Görəsən, bu görüşlərdən sonra elita komandalarının səviyyəsi ilə aşağı divizion klubları arasındakı fərq nə yerdədir?

Sualımızı Fərid Namazova ünvanladıq. Tanınmış futbol eksperti mövzu ilə bağlı fikirlərini Sport1.az-a açıqladı:

"Oyunları yaxından izlədim. Əsas maraqlı görüşlər isə divizion komandaları ilə Premyer Liqa komandaları arasında oldu. "Şahdağ Qusar" - "Turan Tovuz" , "Qəbələ" - "Şəfa və "Şamaxı" - "Baku Sportinq" matçları buna nümunə idi. Düşünürəm ki, illər keçdikcə liqalar arasındakı səviyyə fərqi cüzi də olsa azalır. Bu faktor isə, oyunların daha maraqlı keçməsinə səbəb olur. Xüsusilə qeyd etmək istədiyim "Şəfa" - "Qəbələ" qarşılaşması idi. Bakı təmsilçisi layiqli müqavimət göstərdi. Bəlli hissələr var idi ki, komandalar bərabər oyun göstərirdi. Lakin yenə də, region klubu oyunçu keyfiyyəti baxımdan rəqibi üstələdiyindən qələbə qazanan tərəf oldu. "Şahdağ Qusar" - "Turan Tovuz" matçını da qeyd edərdim. Hətta görüşün son saniyələrində qusarlılar hesabı bərabərləşdirə bilərdi. Ümumən bu oyunlarla bağlı müsbət təəsüratlarım var".

MİKAYIL HACIYEV