Yusif İmanovun "Sabah" rəhbərliyi ilə mübarizəsi - YAZI

Söz vermişdim ki, belə şeylər yazmayacam, amma məcbur qalıram.

Dünən səhər Yusif İmanovun "Sabah"dan ayrıldığını, müqaviləni birtərəfli ləğv etdiyini işıqlandırmışdıq. Məqalədə qeyd etmişdik ki, klub rəhbərliyinin davranışları buna səbəb olub. Millimizin qolkiperi Avstriyadakı toplanışa aparılmadığı, iştirak ərizəsinə salınmadığı üçün belə edib.

Bu məsələ ilə bağlı həmkarlarım da, dostlarımız da mənə yazdılar ki, belə şey ola bilməz. Futbolçu birtərəfli ləğv edə bilməz. Klub onu əvəzedici komandaya göndərsə də, saziş pozula bilməz. Əvvəlcə AFFA-ya müraciət etməlidirlər.

Əslində bunlar doğru fikirlərdir. Amma...

Birincisi redaksiyaya məlumat daxil oldu. Biz də dəqiqləşdirdik. Olduğu kimi də verdik. Xəbər düz çıxdı? Bəli! Heç 2-3 saat keçmədi ki, Yusif İmanov özü paylaşım etdi. Statusdakı bir məqamə diqqət yetirək:

"Təəssüf ki, son 6 ayda klub daxilində mənə qarşı göstərilən subyektiv yanaşma və ayrı-seçkilik halları, həmçinin uyğun şəraitin yaradılmaması mənim karyerama, xüsusilə də millimizin gənc qapıçısı kimi inkişaf perspektivimə mənfi təsir göstərdi".

Yəni, Yusif 6 aydır ki, klub rəhbərliyi ilə mübarizə aparıb. Təlim-məşq toplanışına aparılmaması, UEFA-nın iştirak ərizəsinə adının salınmaması son hədd olub.

Niyə ardıcıl olaraq "Sabah" rəhbərliyi yazıram? "Çelye" ilə oyundan öncə Valdas Dambrauskadan soruşdum ki, qısa müddətdə Yusifdə nə gördünüz ki, Azərbaycan millisinin üzvlərindən birini nə toplanışa apardınız, nə də Avropa Liqasının iştirak ərizəsinə saldınız. Baş məşqçi nə dedi? Dedi ki, bu proseslər məndən öncə olub. Mənə aidiyyatı yoxdur. Yəni, rəhbərlik belə qərar verib, vəssalam!

İndi sual verirəm, belə halda Yusif İmanov müqaviləni birtərəfli ləğv edə bilər? Bəli! Niyə? Çünki futbolçunun təlim-məşq toplanışına aparılmaması, adının iştirak ərizəsinə salınmaması baş məşqçidən asılıdır. O da deyir ki, mənlik deyil. Belə olan halalda millimizin üzvü müqaviləni birtərəfli ləğv edə bilər.

Gələk, FİFA-ya müraciət məsələsinə. Niyə AFFA-nın Oyunçuların Statusu və Transfer Komitəsinə müraciət edilməyib? Çünki bu qurumdakıları İcraiyyə Komitəsinin üzvləri seçirlər. Komitədə kimlər var? "Sabah"ın prezidenti Maqsud Adıgözəlov və klubu yaxınlığı dillərə dastan olan Balakişi Qasımov. Bu faktlardan sonra AFFA-nın Oyunçuların Statusu və Transferi Komitəsinin şikayətə baxacağına və ədalətli olacağına zəmanət verə bilər?

"Sabah"a "Çelye" ilə oyunlarda uğurlar arzu edirəm. Dambrauskas yaxşı məşqçidir. Amma klub rəhbərliyi də işə peşəkar yanaşsalar, oyunu qaydalarına görə oynasalar, daha yaxşı olar...

İLKİN SULTANLI

Sport1.az