“Bu, insanın yaşaya biləcəyi ən xoşbəxt anlardan idi” - Maksim Medvedev

Bu gün Çempionlar Liqasının pley-off mərhələsində “Qarabağ” Macarıstan təmsilçisi "Ferentsvaroş" ilə həlledici oyuna çıxacaq. Qarabağın sabiq kapitanı matç öncəsi Sport1.az-a fikirlərini bölüşüb.

– Qarabağın qrup mərhələsində oynamaq şansı barədə nə düşünürsünüz?

– Təbii ki, hamımız gözləyirik ki, “Qarabağ” Çempionlar Liqasının qrup mərhələsinə düşsün. Bu, komandamıza layiqdir. İlk oyun bizə böyük motivasiya verdi və müəyyən üstünlük qazandırdı. Amma rəqibi heç vaxt zəif görmək olmaz. Düşünməməliyik ki, artıq mərhələ həll olunub. İlk dəqiqələrdən ciddi olmalıyıq, çünki qarşıda güclü futbolçular var.

– Komandanın hazırkı durumu sizi qane edirmi?

– Bəli, komanda tam hazırdır. Bunu həm meydanda göstərilən performansdan, həm də tribunadan azarkeşlərin dəstəyindən hiss etmək olur. İnanırıq ki, sabah Macarıstan klubuna qalib gələcəyik və qrup mərhələsinə vəsiqə qazanacağıq.

– "Kopenhagen"lə oyun zamanı da kapitan siz idiniz. Kapitan kimi belə oyunlarda komandanı meydanda aparmaq necə bir hiss idi?

– Bu, başqa bir duyğudur. Açığı, sözlə ifadə etmək çətindir. Çünki uzun yol gəlmişik, çox əziyyət çəkmişik. Kapitan olaraq komandamı meydanda aparmaq mənim üçün xüsusi qürur idi. Həmin anlar insanın yaşaya biləcəyi ən xoşbəxt hisslərdən biridir. Çünki bilirdik ki, bütün Respublika bizim uğurumuza sevinir. O gün biz özümüzü ən xoşbəxt insanlar kimi hiss edirdik.