İlham Yadullayev: "Ən güclü rəqib "Araz-Naxçıvan"ın bəxtinə düşmüşdü" - AÇIQLAMA

Avrokuboklarda II təsnifat mərhələsinin ilk oyunları başa çatdı. Beynəlxalq turnirlərdə Azərbaycan klubları da iştirak etdilər. "Qarabağ" ÇL-də "Şelburn"u məğlub etdi - 2:0. Konfrans Liqasında "Zirə" "Hayduk"la bacarmadı. "Araz-Naxçıvan" güclü "Aris"i məğlub etdi - 2:1. "Sabah" səfərdə "Petrokub"a qalib gəldi - 2:0. İlk oyunlardan sonra hansı təmsilçimiz növbəti mərhələyə adlaya bilər? Hansı klubumuzun şansı daha azdır. Suallarımızı İlham Yadullayevə ünvanladıq. U-18 millimizin baş məşqçisi mövzu ilə bağlı Sport1.az-a açıqlamasında bunları söylədi:

"Klublarımız avrokuboklara pis başlamışdılar. "Sabah" digər təmsilcilərimizlə müqayisədə mübarizəyə daha erkən qosuldu. Masazır təmsilçisi Avropa Liqasında "Çelye" səddini keçə bilməsə də, oyun planında, əsas da hücumda kreativlik sərgiləyərək 5 qol vurdu. "Bayquşlar" müdafiədəki çatışmazlıqlara görə mübarizədən kənarda qaldılar. Buna rəğmən, Konfrans Liqasında çıxışını davam etdirən Dambrauskasın yetirmələri "Petrokub" səfərindən inamlı qələbəylə qayıtdılar. Düşünürəm ki, evdə də rəqibi məğlub edəcəklər.

"Zirə" "Hayduk"la qarşılaşmanın ilk yarısında pis təsir bağışlamadı, hətta qol da vurdu. Amma fasilədən sonra komandanın oyununda eniş hiss olundu, futbolçularda yorğunluq görsəndi və xorvatlar bundan istifadə edərək bərabərlik qolunu vurdu. Split təmsilçisinin avrokubok təcrübəsi çox olsa da, keçilməz rəqib deyil. Odur ki, hələ heç nə bitməyib. "Qartallar" səfərdə səhvlərə yol vermədən xarakter göstərsələr, mərhələ keçə bilərlər.

"Araz-Naxçıvan" tarixində ilk dəfə avrokuboklarda çıxış etməsinə baxmayaraq, yaxşı oyun sərgilədi. Ən güclü rəqib elə Muxtar Respublika təmsilçisinin bəxtinə düşmüşdü. İlk yarıda sönük oyun keçsə də, naxçıvanlılar üstünlüyə malik idilər. Onlar hətta qol da vurdular. Amma ofsayt qeydə alındı. Yunanlar isə daha çox 2-ci planda oynayırdılar. Elə fasilədən sonra da onlar məhz əks hücumdan qol vurdular. Hesabın açılması Elmar Baxşıyevin komandasını oyatdı. İrəli atılan meydan sahibləri iki gözəl qol vuraraq qələbə qazandılar. Hərçənd onlar hesabı daha da böyüdə bilərdilər. İndi qalır "Araz-Naxçıvan"ın səfərdə eyni motivasiya ilə mübarizə aparması.

"Qarabağ"a gəlincə, son çempion "Şelburn" səfərində də öz dəst-xəttinə sadiq qaldı. Ağdamlıların heyətində yeni oyunçular olsa da, komandanın əsas özəyi və oyun üslubu sabitdir. İlk yarıda "köhlən atlar" daha yaxşı çıxış etdilər. İkinci hissədə meydan sahibləri təmsilçimizə güclə təzyiq göstərsə də, ağdamlılar qapının toxunulmazlığını qoruya bildilər. Oyunun sonlarında rəqib müdafiəsindəki boşluqlardan maksimum istifadə edərək daha 2 qol vurdular.

4 klubumuz da əla oyun sərgilədi. Hesab edirəm ki, cavab görüşləri də maraqlı alınacaq. Bütün təmsilçilərimizə uğurlar arzu edirəm".

MİRZƏ S.