Ayxan Abbasovla İlqar Qurbanovun “Google Maps"i - KÖŞƏ

Millinin baş məşqçisi Ayxan Abbasovla idman direktoru İlqar Qurbanovun Avropa turuna çıxması ilk baxışdan normal görünür.

Namizədləri canlı izləmək, futbolçuların formasını yerində qiymətləndirmək, onların məşqçiləri ilə ünsiyyət qurmaq peşəkar futbolun bir hissəsidir.

Amma bir sual var. Bu qədər geniş Avropa turuna həqiqətən ehtiyac var?

Əvvəl Rumıniyada Cəlal Hüseynova baxıblar. Sonra “Sabah”ın oyununa keçiblər. Ardınca Niderlandda “Qarabağ”ı, Xorvatiyada Mahir Emreli­ni, İstanbulda isə Toral Bayramovu izləyiblər. Nəriman Axundzadənin oyununa isə vaxt çatmayıb.

Burada artıq başqa sual yaranır. Futbolçu seçimi doğrudanmı bu qədər genişdir?

Söhbət yüzlərlə oyunçudan getmir. Cəlalın, Mahirin, Nərimanın, Toralın harada oynadığını, nəyə qadir olduğunu bilirik. “Qarabağ”ın, “Sabah”ın və digər klubların aparıcı futbolçularının potensialları da hamıya bəllidir.

Normalda baş məşqçi yeni oyunçu axtaranda onun oyununu izləmək üçün səfərə gedir. Yaxud bu işi skautinq komandası görür. Namizəd müəyyənləşdirilir, oyunu izlənilir, məlumat toplanır və baş məşqçiyə təqdim olunur.

Bizdə isə mənzərə bir qədər başqadır. Ayxan Abbasovla İlqar Qurbanov birlikdə Avropaya çıxıblar, bir neçə oyuna baxıblar və Bakıya qayıdıblar. Üstəlik, söhbət hamının tanıdığı futbolçulardan gedir.

Bu, skautinqdir, yoxsa iki köhnə dostun futbol bəhanəsi ilə Avropa turu? Bütün bu səfərlərin sonunda yeni futbolçu tapılacaqsa, buyursunlar. Amma nəticədə yenə məlum 20-25 futbolçunun arasından seçim ediləcəksə, gəzintilərini bizə “iş görürük” adı ilə sırımasınlar.

Hə, bu arada! Millinin skautluğunda sərhəd yoxdur. Pul AFFA-nın, iş sizin! Amma biletin də, ezamın da ayrı-ayrı qiyməti var.