Avropa ikincisi olmuş azərbaycanlı müvəqqəti güləşdən uzaqlaşdırıldı

Birləşmiş Dünya Güləşinin (UWW) müstəqil antidopinq proqramını həyata keçirən Beynəlxalq Test Agentliyi (ITA) 2026-cı il iyulun 12-də U20 Avropa Çempionatı zamanı azərbaycanlı idmançıdan götürülmüş nümunədə meldonium maddəsi aşkarlandığını açıqlayıb.

Sport1.az xəbər verir ki, söhbət Nurlan Ağazadə gedir. 

Sərbəst güləşçi A nümunəsinin nəticəsi ilə bağlı məlumatlandırılıb və B nümunəsinin analizini tələb etmək hüququna malikdir. B nümunəsinin də müsbət nəticə verməsi və ya analizinin tələb olunmaması halında iş təsdiqlənmiş antidopinq qaydalarının pozulması kimi davam etdiriləcək.

İdmançıya qarşı məcburi müvəqqəti uzaqlaşdırma qərarı da qəbul edilib. Ağazadənin bu qərara etiraz etmək və onun ləğvini tələb etmək hüququ var.

Hazırda işin araşdırılması ITA tərəfindən aparılır. Agentlik araşdırma davam etdiyi üçün əlavə açıqlama verməyəcəyini bildirib. Hələlik cəza müddəti barədə qərar qəbul olunmayıb.

Qeyd edək ki, U-20 Avropa Çempionatı 6 – 12 iyulda Şimali Makedoniyanın paytaxtı Skopyedə keçirilib. Həmin yarışda Nurlan Ağazadə 74 kq çəki dərəcəsində çıxış edib. O, finalda uduzaraq, gümüş medal qazanıb. Ağazadə 2025-ci il U-20 Dünya Çempionatında isə bürünc medala sahib olub.