Azərbaycanın qadın güləşçiləri U-20 Dünya Çempionatının yarımfinalında

Azərbaycanın iki qadın güləşçisi U-20 Dünya Çempionatında yarımfinala yüksəlib.

Sport1.az xəbər verir ki, bu barədə Azərbaycan Güləş Federasiyasının mətbuat xidməti məlumat yayıb.

57 kq çəki dərəcəsində mübarizə aparan Günay Qurbanova macarıstanlı Liliana Kapuvarini (12:1), özbəkistanlı Ulbiye Karılıbayeva (11:1) və kanadalı Aqniya Krakovskayanı (tuş) məğlub edərək adını yarımfinala yazdırıb. O, finala gedən yolda hindistanlı Tanvi Gundeş Maqdumla qarşılaşacaq.

59 kq çəkidə çıxış edən U-20 Avropa çempionatının 3 qat qalibi Ruzanna Məmmədova isə ispaniyalı Roza Molina Rodriqesi (10:0) və hindistanlı Komal Komalı (14:2) məğlub edərək yarımfinala yüksəlib. Onun növbəti rəqibi Macarıstan təmsilçisi Eda Balaş olacaq.

Sərbəst güləşdə 61 kq çəkidə mübarizə aparan Camal Abbasov moldovalı Marçel Andronakeni və monqolustanlı Dulquun Enxbaatarı 10:0 hesabı ilə məğlub etsə də, 1/4 finalda amerikalı Aaron Ceyms Zaydelə 2:13 hesabı ilə uduzub.

86 kq çəki dərəcəsində çıxış edən Məhəmməd Abbaszadə isə bolqarıstanlı Alan Tigiyevi tuşla məğlub edib. O, 1/4 finalda türkmənistanlı Alp Arslan Begenjova 1:14 hesabı ilə uduzaraq mübarizəni dayandırıb.