Qvardiola: “Məşqçiləri rahat buraxın”
“Mançester Siti”nin baş məşqçisi Pep Qvardiola mövsümün sonlarında motivasiyasız rəqiblərə qarşı oyunlarla bağlı sualı cavablandırıb.
“Şəhərlilər” bu gün Premyer Liqa çərçivəsində öz meydanında “Kristal Pelas”la üz-üzə gələcək. Oliver Qlasnerin rəhbərlik etdiyi komanda artıq çempionatda ciddi turnir hədəfi uğrunda mübarizə aparmır və diqqətini iki həftə sonra keçiriləcək UEFA Konfrans Liqasının final matçına yönəldə bilər. “Kristal Pelas” həlledici oyunda “Rayo Valyekano” ilə qarşılaşacaq.
Sport1.az xarici KİV-ə istinadən xəbər verir ki, jurnalistlər Qvardioladan Premyer Liqanın son turlarında bəzi komandaların optimal heyətlə oynamaması haqda soruşublar. İspaniyalı mütəxəssis isə belə cavab verib:
“Qoy məşqçilər lazım bildiklərini etsinlər. Liqa rəhbərliyi bu məsələlərə nə qədər az qarışsa, hamımız üçün bir o qədər yaxşı olar. Qlasneri və digər məşqçiləri rahat buraxın. Burada heç bir problem yoxdur”.
“Mançester Siti” bu turda qələbə qazanacağı halda, lider “Arsenal”la xal fərqini ikiyə endirəcək.
