UEFA-dan iki kluba sərt cəza
UEFA Konfrans Liqasında azarkeşlərin arzuolunmaz davranışlarına görə "Şaxtyor" və AEK klublarını sərt şəkildə cəzalandırıb.
Sport1.az xəbər verir ki, "Reuters" agentliyinin məlumatına görə, qurum hər iki komandanı "Kristal Pelas"la matçlardakı intizamsızlıq səbəbindən sanksiyalara məruz qoyub.
Kiprin AEK klubu mart ayında 1/8 final mərhələsi çərçivəsində baş tutan görüşdə azarkeşlərin təhqiramiz şüarlarına görə 50 min avro cərimə edilib. Bununla yanaşı, komanda UEFA bayrağı altında keçirəcəyi növbəti ev oyununda stadionun bir hissəsinin bağlanması cəzası ilə də üzləşib.
Ukrayna təmsilçisi "Şaxtyor" isə aprel ayında Polşanın Krakov şəhərində keçirilən yarımfinalın ilk oyunundakı qadağan olunmuş pankartlara və şüarlara görə 30 min avro cərimələnib. Donetsk klubuna kəsilən stadionun qismən bağlanması cəzası isə iki illik sınaq müddəti şərti ilə təxirə salınıb. Klub həmçinin stadionda pirotexniki vasitələrdən istifadəyə görə əlavə olaraq 4 min avro cərimə ödəməli olacaq.
