Bu məlumat "Sabah"ın futbolçusunun sevinməsinə səbəb oldu - MÜSAHİBƏ

Misli Premyer Liqasının 28-ci turunda "Qarabağ" - "Sabah"a məğlub oldu - 0:1.

Qarşılaşmadan sonra "bayquşlar"ın üzvü Aron Maluda Sport1.az-ın suallarını cavablandırdı.

– Oyun barədə nə deyə bilərsiniz?
– Çox sevincliyik. Çətin qələbə oldu. Qırmızı vərəqə aldıq. Amma bu situasiya komandanın nə qədər möhkəm və bir-birinə bağlı olduğunu göstərdi. Sonradan oyuna daxil olan futbolçular da kollektivin bir hissəsi kimi çıxış etdilər.

– Qarşıda kubok oyunu var və yenə “Qarabağ”a qarşı oynayacaqsınız. Komandanın psixoloji durumu necədir?
– Bəli, dörd gün sonra kubok oyunumuz var. Yenə “Qarabağ”a qarşı oynayacağıq. Amma hələ çempion olmamışıq. Çox sevinib, rahatlaşa bilmərik. Mövsümü sona qədər ciddi davam etdirməliyik.

– Azərbaycan Kubokunu da qazansanız, ölkə tarixində “qızıl dubl” edən üçüncü komanda olacaqsınız...
– Bunu bilmək xoşdur. Amma hazırda əsas diqqətimizi kubok matçına yönəltməliyik. Sonrasını zaman göstərəcək.

– Oyunun gedişində qırmızı vərəqə aldınız. Həmin vəziyyət barədə nə deyə bilərsiniz?
– Açığı, epizodu tam görə bilmədim. Qırmızı vərəqə idi, ya yox – bunu dəqiq deyə bilmərəm. Amma hakim belə qərar verdi. Ona hörmətlə yanaşmalıyıq. 10 nəfərlə çox əziyyət çəkdik, əsasən müdafiə olunduq. Buna baxmayaraq, belə şəraitdə qələbə qazanmaq çox önəmlidir.

MƏHƏMMƏD HÜSEYNOV