"Sabah" "Qarabağ"la oyunda ilk dəfə bunu etməyə məcbur olub - MÜSAHİBƏ

Misli Premyer Liqasının 28-ci turunda "Qarabağ" - "Sabah"a məğlub oldu - 0:1.

Qarşılaşmadan sonra Masazır təmsilçisinin üzvü Timoteuş Puxaç Sport1.az-ın suallarını cavablandırdı.

Həmin müsahibəni təqdim edirik...

-Vacib qələbə qazandınız. Üstəlik, Kubokda yenidən “Qarabağ”la qarşılaşacaqsınız. Bu oyun və qarşıdakı görüş barədə fikirləriniz necədir?
- Qarşıda kubok oyunumuz var, ona görə də çox da bayram edə bilmərik. Hələ çempion deyilik və sona qədər mübarizə aparacağıq. İndi diqqətimizi kuboka yönəltmişik. Evdə onlara qarşı oynayacağıq. Oyuna gəldikdə isə bu cür görüşlər həmişə xoş olur. Düşünürəm ki, ilk hissədə həm onlar, həm də biz qol vura bilərdik. Meydanda yaxşı iki komanda, hücum futbolu, cəsarət və qorxu olmayan mübarizə var idi. Belə davam etməliyik.

-Qırmızı vərəqə aldıqdan sonra komanda bir hissəni azlıqda keçirdi, amma yenə də qol buraxmadınız...
-Düşünürəm ki, bu, kollektiv üçün çox yaxşı işlərin nəticəsi idi. Müdafiə olunmağı bacardıq. Eyni zamanda məşqçilər heyətinin qərarı da düzgün idi. Meydana əlavə mərkəz müdafiəçisi saldılar. Beşli xətt formalaşdırdıq. Açığı, bunu əvvəl məşq etməmişdik. Amma futbolçuların reaksiyası çox yaxşı oldu. Qol buraxmadıq. Bu da bizi çox sevindirir.

-Artıq çempionluğu qeyd etməyin vaxtıdırmı?
-Xeyr. Riyazi olaraq hələ çempion deyilik, işimiz bitməyib. Bunu sona çatdırmalıyıq. Üstünlük yaxşıdır, amma hələ hər şey bitməyib.

- Komandanın Çempionlar Liqasında oynamaq ehtimalı var. Bu sizi nə dərəcədə motivasiya edir?
-Təsəvvür edə bilməzsiniz nə qədər çox istəyirəm. Amma dediyim kimi, indi diqqətim növbəti oyundadır. Qarşımızda iki kubok qazanmaq şansı var. Bu, çox böyük fürsətdir. İndi buna fokuslanmalıyıq.

-Klubdakı gələcəyiniz barədə qərar vermisinizmi?
-Bilmirəm. Burada qalmaq istərdim. Kollektivi sevirəm. Amma bu məsələlər həmişə müqavilələrə, klublara və maliyyəyə bağlı olur. Ona görə də qalmaq və ya getmək asan qərar deyil. Amma deyə bilərəm ki, bu komanda ilə oynamağı çox sevirəm. "Sabah" həqiqətən möhtəşəmdir.

MƏHƏMMƏD HÜSEYNOV