Riçard Almeyda: “Qarabağ” mənim üçün sadəcə klub deyildi"

“Qarabağ”ın sabiq futbolçusu Riçard Almeyda Ağdam klubundakı karyerasını xatırlayıb.

Sport1.az xəbər verir ki, braziliyalı yarımmüdafiəçi ölkəsinin “Metropoles” nəşrinə açıqlamasında bunları deyib:

“Əməyin qiymətləndirilməsi çox xoş hissdir. Demək olar ki, 14 ilə yaxın “Qarabağ”da çıxış etdim. Bunun təxminən 10 il yarımında əsas heyətin dəyişməz üzvü oldum. Digər illərdə isə həm əsas, həm də ehtiyat oyunçu kimi komandaya fayda verməyə çalışdım. Baş məşqçinin etimadını hər zaman hiss edirdim. Klubda təkcə meydanda yox, meydandan kənarda da lider idim. Oynamadığım vaxtlarda belə komandaya dəstək olur, xüsusilə paltardəyişmə otağında ruh yüksəkliyi yaradırdım”.

Almeyda “Qarabağ”da çıxış etməyin onun üçün xüsusi əhəmiyyət daşıdığını da vurğulayıb:

“Futbol belədir – zəhmət çəkirsən və qarşılığını alırsan. Allaha şükür ki, çox çalışdım və hər şey yaxşı alındı. Bu hiss sözlə ifadə olunmayacaq qədər gözəldir. Uşaq vaxtı Çempionlar Liqasına baxanda atama deyirdim ki, bir gün orada oynamaq istəyirəm. Şükürlər olsun ki, buna nail oldum. Qrup mərhələsində çıxış etdim. Bundan əvvəl isə dəfələrlə pley-off oynadıq və bir neçə dəfə buna çox yaxın olduq”.

Qeyd edək ki, Riçard Almeyda 2012-2018, 2019 və 2021-2025-ci illərdə “Qarabağ”ın formasını geyinib. O, bu müddətdə 376 oyunda 64 qol vurub. Azərbaycan millisində isə 2017-2023-cü illərdə 31 matçda 3 qolla yadda qalıb. Təcrübəli futbolçu 2026-cı ilin martında Braziliyanın D Seriyasında çıxış edən “XV de Piraçiçaba” klubuna transfer olunub.