Kadi Borges: “Tam hazır deyiləm, amma komandama kömək edəcəyəm”

“Sabah” kimi komandalara qarşı oynamaq çox çətindir”.

Bu sözləri Sport1.az saytına açıqlamasında “Qarabağ”ın futbolçusu Kadi Borges Azərbaycan Kubokunun yarımfinal mərhələsi çərçivəsində “Sabah”la keçirilən (2:2) oyundan sonra deyib.

Braziliyalı futbolçu hələ heç nəyin bitmədiyini vurğulayıb:

“Onların yaxşı heyəti və sistemi var. Düşünürəm ki, öz meydanımızda yaxşı çıxış etdik. Bir neçə qol epizodundan yararlana bilmədim. Amma yenə də yaxşı oyun sərgilədiyimizi düşünürəm. Qarşıda cavab görüşü var, ona hazırlaşmalıyıq”.

Uzunmüddətli zədədən yeni qayıdan futbolçu hələ tam hazır olmadığını da bildirib:

“Çox çətin idi. Ayağım sınmışdı. Bəzən yenə də ağrılar olur. Amma özümü yaxşı formada hiss edirəm. 99 faiz sağaldığımı düşünürəm. 100 faiz hazır olmaq üçün bir az da oynamağa ehtiyacım var”.

Qeyd edək ki, bu komandalar arasında cavab qarşılaşması aprelin 22-də keçiriləcək.

MİRZƏ SAKİT