İvan Lepiniça: “Rəqib “Qarabağ”dırsa, iş daha da çətinləşir”

“Hər iki komanda yaxşı oyun sərgilədi”.

Bu sözləri Sport1.az saytına açıqlamasında “Sabah”ın futbolçusu İvan Lepiniça Azərbaycan Kubokunun yarımfinal mərhələsi çərçivəsində “Qarabağ”la oyundan (2:2) sonra deyib.

Xorvatiyalı yarımmüdafiəçi ilk hissədə Ağdam təmsilçisinin yüksək pressinq səviyyəsini vurğulayıb:

“İlk hissə bizim üçün gözlənilməz oldu. Rəqib güclü pressinq tətbiq edirdi və topla oynamağımıza imkan vermirdi. Bu da normaldır, çünki hər matçda topa sahib olub yaxşı vəziyyətlər yarada bilmərik. Üstəlik, rəqibimiz ‘Qarabağ’dırsa, iş daha da çətinləşir. Təzyiqdən necə çıxacağımızı bilmirdik. Fasilədə soyunub-geyinmə otağında danışdıq və fasilədən sonra vəziyyəti öz xeyrimizə çevirməyi bacardıq. Qarşıda cavab oyunumuz da var. Bu oyunda əsas məqsədimiz məğlub olmamaq idi və yaxşı nəticə əldə etdik. Evdə oynayacağımız üçün üstünlüyümüz olacaq. Amma istəməzdim ki, liqa matçı hələ qalıb, biz artıq kubokdan danışaq”.

Qeyd edək ki, komandalar arasında cavab oyunu aprelin 22-də keçiriləcək.

MİRZƏ SAKİT