Ayxan Abbasovun diqqətinə: MLS-də çıxış edən futbolçu Azərbaycan millisində oynamaq istəyir

Nəriman Axundzadənin ABŞ təmsilçisi “Kolumbus Kru” klubuna keçdiyi hər kəsə məlumdur.

Bir çoxları düşünür ki, 21 yaşlı hücumçu MLS-də çıxış edən ilk yerli futbolçudur. Lakin vəziyyət tam da belə deyil.

Sport1.az-ın əldə etdiyi məlumata görə, həmin çempionatda çıxış edən daha bir azərbaycanlı futbolçu da var. 

Söhbət “Hyuston Dinamo” formasını geyinən Roman Kərimovdan gedir.

18 yaşlı qolkiper 4 ildir ki, ABŞ-da yaşayır. Üç mövsümdür ki, “Hyuston Dinamo”nun ikinci komandasında çıxış edir.

Futbolçunun verdiyi açıqlamaya görə, atası və babası azərbaycanlıdır. O, gələcəkdə şans veriləcəyi təqdirdə millimizdə çıxış etməyi arzuladığını bildirib.

Qeyd edək ki, 185 sm boya malik oyunçunun yalnız Rusiya vətəndaşlığı var.