“Neftçi”nin futbolçusu ümidlidir: “Hələ də şansımız var” – MÜSAHİBƏ

Misli Premyer Liqasının 23-cü turunda "Neftçi" doğma meydanda "Turan-Tovuz"a məğlub oldu - 0:1.

Qarşılaşmadan sonra "ağ-qaralar"ın üzvü İmad Faraj Sport1.az-ın suallarını cavablandırdı...

– Oyun haqqında fikirləriniz?

– İlk hissədə daha yaxşı oynadıq. Bir neçə şansımız oldu, amma onları dəyərləndirə bilmədik. İkinci yarıda isə rəqib demək olar ki, bir real imkan əldə etdi və onu da qola çevirdi.

– Məğlub durumda idiniz, amma oyunun son dəqiqələrində iki dəfə yerə yıxıldınız. Ciddi zədə aldınız?

– Xeyr, sadəcə qıcolma baş vermişdi. Oyunun son dəqiqələrində hiss etdim. Ciddi bir şey yoxdur.

– Əsas rəqibləriniz xal itirəndə komanda olaraq bundan istifadə edə bilmirsiniz. Bunun səbəbi nədir?

– Açığı, xüsusi bir səbəbi yoxdur. Dediyim kimi, ilk hissədə daha yaxşı oynadıq. Belə oyunları geri çevirmək çətin olur. Ona görə də gələcək qarşılaşmalarda çətin vəziyyətə düşməmək üçün əlimizdən gələni edəcəyik.

– Bu məğlubiyyətdən sonra avrokubok hədəfi haqqında danışmaq hələ də realdır?

– Bizim əsas məqsədimiz oyunları qazanmaqdır. Amma nəzərə alsaq ki, bu tur "Zirə", "Araz-Naxçıvan", "Sumqayıt" xal itirdi, düşünürəm ki, hələ də şansımız var.

MƏHƏMMƏD HÜSEYNOV