La Liqa prezidentindən sensasion Messi açıqlaması

İspaniya La Liqasının prezidenti Xavyer Tebas “Barselona”nın sabiq baş məşqçisi Xavinin Lionel Messinin 2023-cü ildə Kataloniya klubuna qayıdışı ilə bağlı dediklərini təkzib edib.

Sport1.az xəbər verir ki, bu barədə qurum rəhbəri “The Touchline”a açıqlamasında danışıb. O bildirib ki, həmin vaxt argentinalı hücumçunun “Barselona”ya dönüşü ilə bağlı La Liqa tərəfindən heç bir icazə verilməyib.

Xatırladaq ki, Xavi daha əvvəl Messi transferinin 2022-ci ildə keçirilən dünya çempionatından sonra demək olar həll olunduğunu demişdi. Onun sözlərinə görə, ulduz futbolçu “Barselona”ya qayıtmaq istəyirdi və klubun La Liqadan buna icazə aldığı bildirilirdi.

Lakin Kataloniya təmsilçisinin prezidenti Joan Laporta bu keçidin baş tutmasına mane olub. O, Messinin qayıdışının klub daxilində maaş balansını poza biləcəyini və bunun “Barselona” üçün ciddi maliyyə problemləri yarada biləcəyini əsas gətirib.