"Araz-Naxçıvan"ın futbolçusu İtaliya klubu ilə razılaşdı - İDDİA

“Araz-Naxçıvan”ın üzvü Ömər Muradov karyerasını İtaliyada davam etdirəcək.

Sport1.az xəbər verir ki, bu barədə “goal.kz” saytı məlumat yayıb. 18 yaşlı yarımmüdafiəçi A Seriyası təmsilçisi “Bolonya” ilə müqavilə imzalayıb.

Tərəflər arasında danışıqlar təxminən altı həftə davam edib. Prosesdə klubun idman direktoru, İtaliya futbolunun tanınmış simalarından biri Marko Di Vaio da iştirak edib.

Qazaxıstanın Almatı şəhərində anadan olan Muradov futbol karyerasına “Kayrat-F2”də başlayıb. Daha sonra “Sumqayıt”ın U-17 komandasında çıxış edərək Azərbaycan çempionu olub. Hazırda isə o, “Araz-Naxçıvan”ın U-19 komandasının üzvüdür. “On nömrə” mövqeyində çıxış edən futbolçu Qazaxıstanın gənclər millisinə namizəd hesab olunur.

Qeyd edək ki, Muradova “Milan”, “Jirona” və ÇSKA (Moskva) maraq göstərib.