"Bu vəziyyətdə penalti qərarı verilməməli idi" – "Neftçi" rəsmisi

Misli Premyer Liqasının 22-ci turunda “Şamaxı” doğma meydanda “Neftçi” ilə heç-heçə etdi - 2:2.

Sport1.az xəbər verir ki, qarşılaşmadan sonra “ağ-qaralar"ın baş icraçı direktoru Cenk Sümer jurnalistlərə açıqlama verdi. 

Klub rəsmisi görüşlə bağlı bunları söylədi:

“Hər iki komandanı təbrik edirəm. Oyun şərtləri çox çətin idi. Həm stadionun durumu, həm də hava şəraiti baxımından çətinlik var idi. Oyunun müəyyən hissəsində göz gözü görmürdü. Komandamız əlindən gələni etdi. Bəzən istədiyin nəticəni əldə edə bilmirsən. Qələbə qazandığın matçda son saniyədə xal da itirə bilərsən. Amma yolumuza davam edirik, inkişaf dönəmindəyik. Müəyyən səhvlər olsa da, səfərdə üstəlik, asan olmayan rəqibə qarşı göstərdiyimiz oyundan məmnunam. Mövsümün sonunda məqsədlərimizə çatacağımıza inanıram”.

"Neftçi" rəsmisi hakim qərarları ilə bağlı sualı belə cavabladı:

“Referilərin çox diqqətli olmaları lazımdır. Bu, təkcə bizə yox, bütün komandalara qarşı ədalətli yanaşma deməkdir. Federasiya hakimliklə bağlı ciddi işlər görür. Hakimlər Komitəsi mütəmadi dərslər təşkil edir. Biz də bunun nəticəsi olaraq daha düzgün qərarlar gözləyirik. İlk qolda bariz ofsayt var idi. İkinci epizodda isə ilk anda açıq-aşkar qayda pozuntusu olduğunu düşünürəm. Penalti epizodunda bizim oyunçu əvvəlcə topa müdaxilə edir, daha sonra rəqib təmas yaradır. Bu vəziyyətdə penalti qərarı verilməməli idi. Baş hakim epizodu görərək əvvəlcə bizim xeyrimizə qərar verdi, lakin VAR-ın müdaxiləsindən sonra penalti təyin olundu. Məncə, bu qərar düzgün deyildi. Təbii ki, belə məqamlar bizi üzür. Amma bu hallar bizi yolumuzdan döndərməyəcək. Qarşıdakı oyunlara fokuslanmışıq və avrokuboklara vəsiqə qazanmaq üçün mübarizəni davam etdirəcəyik”.

Cenk Sümer “Neftçi”nin hücumçusu Abubakarın performansını da dəyərləndirdi:

“Demişdim ki, gəlir, toxunur və qol olur. Cümləmi bitirdim və yenə fərqləndi. Abubakar üzərinə düşən işi görən peşəkar futbolçudur. Təkcə “Neftçi” yox, Azərbaycan futbolu üçün də böyük şansdır. Belə səviyyəli oyunçuların liqamıza gəlməsi asan məsələ deyil. Onların burada göstərdiyi performans məni həm klub nümayəndəsi, həm də futbol adamı kimi sevindirir. Ümid edirəm ki, bu cür transferlərin davamı gələcək”.

MƏHƏMMƏD HÜSEYNOV