Tarixini unutmayan, əfsanəsini yaşadan – “Neftçi”
Azərbaycan futbolunun flaqmanı bir daha göstərdi ki, böyük klub olmaq təkcə meydandakı nəticələrlə ölçülmür. Böyük klub olmaq tarixə sahib çıxmaq, əfsanəni unutdurmamaq, keçmişi gələcəyə daşımaqdır.
Dünən “ağ-qaralar”ın və Azərbaycan futbolunun əvəzolunmaz simalarından olan Anatoli Banişeviskinin anadan olmasının 80 ili tamam oldu. Bu yubiley təkcə bir tarix deyil, bütöv dövrün, məktəbin, futbol mədəniyyətinin xatirəsidir.
Klub rəhbərliyi, baş məşqçi, komandanın kapitanı və əfsanənin ailə üzvləri Banişevskinin məzarını ziyarət edərək önünə çələng qoyublar. Bu, sadəcə bir mərasim deyil sədaqətin, ehtiramın və minnətdarlığın simvoludur.
Bununla da kifayətlənməyən “Neftçi” əfsanəvi “9 nömrə”nin adını sonsuzadək yaşatmaq üçün növbəti tarixi addımı atdı. Komandanın ev oyunlarını keçirdiyi “Palms Sports Arena” stadionunda ən böyük tribunalardan biri olan “Cənub” tribunası bundan sonra Anatoli Banişevskinin adını daşıyacaq.
Üstəlik, həm Azərbaycan futbolunun, həm də “Ağ-qaralar”ın əfsanəsinin yubileyi münasibətilə sənədli film də hazırlanıb. Bu film yeni nəsillərə Banişevski irsini çatdıracaq, “9 nömrə”nin meydandakı sehri və xarakteri haqqında danışacaq.
“Neftçi” bununla bir daha öz tarixinə bağlılığını, hörmət və sevgisini sübut etdi. Çünki əfsanələr unudulmur, yaşadılır.
MƏHƏMMƏD HÜSEYNOV
