"Kəpəz"in gündəmdə olan mövzusu ilə bağlı ARAŞDIRMA

Bir neçə gün öncə "Sport1 TV"də yayımlanan "Ötürmə" verilişində "Kəpəz"in İdarə Heyətinin üzvü Fərman Əlizadənin Akademiyanın 2 meydançası üçün klubdan rəhbərlik etdiyi "Agrosport" şirkətinə aylıq 24 000 manat köçürüldüyünü demişdim.

Əlavə olaraq, "Turan-Tovuz"un əvəzedicilərdən ibarət komandasının da Akademiyanın ehtiyat meydançasında keçirdiyi ev oyunları üçün ödəniş etdiyini vurğulamışdım. 

Bu informasiya ölkə gündəmində ciddi rezonans doğurdu. Jurnalistikaya gələndən prinsiplərim olub. Həqiqət mənim üçün ən vacib mövhumdur.

Bu səbəbdən də mövzu ilə bağlı ciddi araşdırmalar etdim. Hətta bəzi sənədlər də əldə etmişəm. Mənbəyə zərər verməməkdən ötrü həmin dosyeləri təqdim etmək hüququm yoxdur.

Əldə etdiyim məlumatlar və faktların yekununda məlum oldu ki, "Kəpəz" tərəfindən Akademiyanın meydançaları üçün "Agrosport" şirkətinə heç bir ödəniş edilmir. Əksinə, "Agrosport" şirkəti tərəfindən kluba müəyyən yatırım edilib.

Bundan başqa, "Turan-Tovuz"un əvəzedici komandasının Akademiyanın ehtiyat meydançasında keçirdiyi ev oyunlarına görə də heç bir ödəniş olunmur.

Mövzu ilə bağlı daha geniş məlumatları növbəti verilişdə ətraflı ictimaiyyətə təqdim edəcəm.

İLKİN SULTANLI