"Şamaxı"nın üzvü: "Kim istəməz ki, millidə oynasın?" – MÜSAHİBƏ
Misli Premyer Liqasının 20-ci turunda “Şamaxı” doğma meydanda “Turan-Tovuz”la qolsuz heç-heçəyə razılaşdı – 0:0.
Qarşılaşmadan sonra ev sahiblərinin üzvü Arsen Ağcabəyov Sport1.az-ın suallarını cavabladı.
Həmin müsahibəni təqdim edirik...
– Oyun haqqında fikirləriniz?
– Çox çətin görüş oldu. “Turan-Tovuz” kimi komandanın uzunboylu və sürətli oyunçuları var. Bu da bizə çətinlik yaratdı. Xüsusilə künc zərbələri zamanı müdafiəçiləri hücuma qoşulurdu. Oyunda çox güc sərf etdik. Əsas odur ki, məğlub olmadıq. Təbii ki, məqsədimiz hər zaman qələbə qazanmaqdır.
– 2025-ci ildə Premyer Liqada ən çox oyuna çıxan iki futbolçudan biri idiniz. Bu il də mütəmadi şans qazanırsınız. Millidən dəvət gözləyirsinizmi?
– Əlbəttə! Gözləyirəm. Kim istəməz ki, millidə oynasın? Ayxan müəllim məni layiq görərsə, milliyə dəvət edəcəyini düşünürəm.
– Millətlər Liqasında millimizin rəqibləri bəlli oldu. Bu barədə nə deyə bilərsiniz?
– Qalib gəlinəsi rəqiblərdir. Əlbəttə, çətin komandalarla qarşılaşacağıq, oyunlar asan olmayacaq. Böyük turnirdir, inşallah mərhələ adlayarıq.
– Növbəti oyunda “İmişli” ilə səfərdə qarşılaşacaqsınız. Həmin görüş barədə fikirləriniz?
– Çətin oyun olacaq. Meydança amili əsas problemlərdən biridir. Biz orada ilk dəfə oynayacağıq, rəqib isə artıq stadiona öyrəşib. Amma yenə də qələbə üçün yollanacağıq, stadionun vəziyyətini bəhanə etməyəcəyik.
MƏHƏMMƏD HÜSEYNOV
