Simeonenin gələcəyi bundan asılıdır

Madridin “Atletiko”sunda Dieqo Simeonenin gələcəyi gündəmdədir.

Sport1.az xəbər verir ki, “The Touchline”ın X sosial şəbəkəsində yaydığı məlumata görə, argentinalı mütəxəssis bu mövsüm İspaniya Kubokunu və ya hər hansı digər titul qazanacağı təqdirdə klub rəhbərliyi ona yeni müqavilə təklif edəcək. Hazırkı sözləşmənin müddəti 2027-ci ilin yayına qədər nəzərdə tutulub.

Paytaxt təmsilçisində hesab edirlər ki, mövsüm ərzində edilən transferlər baş məşqçiyə yaxın bir-iki il ərzində UEFA Çempionlar Liqasında mübarizə aparacaq səviyyədə kollektiv formalaşdırmaq imkanı yaradır.

Qeyd edək ki, fevralın 12-də madridlilər İspaniya Kubokunun yarımfinal mərhələsinin ilk oyununda “Barselona”nı 4:0 hesabı ilə məğlub ediblər. Çempionlar Liqasının ümumi mərhələsini isə 14-cü pillədə başa vuran komanda növbəti raunda yüksəlmək üçün “Brügge” ilə pley-off matçlarında üz-üzə gələcək.