Premyer Liqaya gəlmək istəyən klub niyə primitiv səhvlər edir? - AÇIQLAMA

AFFA İntizam Komitəsinin 1 aprel 2025-ci il tarixində I Liqa klubları bağlı cəzaları açıqlamışdı.

Kollektivlər arasında ən çox xərcə düşən “Zaqatala”dır. Bölgə təmsilçisi XIX turda “Qaradağ Lökbatan” ilə qarşılaşmada Zona 1-də akkreditasiyası olmayan şəxslərə görə 50, oyun bitdikdən sonra meydana kənar şəxslər daxil olduğuna görə 80, matçda xərəkdaşıyanların say limiti pozulduğuna görə də 80, ümumlikdə klub 210 manat cəzalanmışdı.

Görəsən, Premyer Liqaya yüksəlmək arzusunda olan klub nə üçün belə sadə problemlərlə üzləşir? Sualımızı baş məçqçi Rüstəm Məmmədova ünvanladıq. Çalışdırıcı Sport1.az-a açıqlamasında bunları söylədi:

“Xərəkdaşıyanlarla bağlı bizim həmişə problemimiz olub. Bunun əsas səbəbi oyunların başlama saatı ilə bağlıdır. Xərəkdaşıyanlar aşağı yaş qruplar üzrə komandalarımızın futbolçularıdır. Oyunlar başlayan vaxtda onların əksəriyyəti məktəbdə olurlar. Ona görə də xərəkdaşıyanların sayında həmişə problemlərimiz olur. Digər qayda pozuntularına gəlincə, diqqətsizliyə yol vermişik və akkreditasiyası olmayan şəxslər Zona 1-də yer alıblar. Oyun bitəndən sonra meydançaya kənar şəxslər daxil olması polislərin və mühafizəçilərin məsuliyyətsizliyidir. Qarşıdakı turlarda bu məsələlərdə daha da diqqətli olacağıq”.