Araz Abdullayev: “Komanda olaraq bunu bacaracağıq”

“Karvan-Yevlax”ın kapitanı Araz Abdullayev qış hazırlıq prosesi ilə bağlı klubun mətbuat xidmətinə açıqlama verib.

Sport1.az xəbər verir ki, təcrübəli futbolçu hazırlığın yaxşı keçdiyini bildirib: “Qış hazırlığımız normal tempdə davam edir. Mən və komanda yoldaşlarım məşqlərdə böyük səylə çalışırıq. Hazırlıq prosesi gündə iki məşq olmaqla keçirilir. Füzuli müəllimin verdiyi tapşırıqları maksimum dərəcədə yerinə yetirməyə çalışırıq. Düşünürəm ki, “Sabah”la çempionat oyununa qədər tam hazır olacağıq”.

Kapitan komandanın qarşısına qoyduğu əsas hədəfə də toxunub: “Əsas fikrimiz turnir cədvəlinin son pilləsindən uzaqlaşmaq və daha yuxarı yerlər uğrunda mübarizə aparmaqdır. Düşünürəm ki, bunu komanda olaraq bacaracağıq”.