“Fərdi səhvlər komandaya baha başa gəlir” – Saşa İliç

“Sumqayıt” Antalya toplanışı çərçivəsində dünən Serbiyanın “OFK Belqrad” komandası ilə yoxlama matçı keçirib və oyun 1:4 hesablı məğlubiyyətlə yekunlaşıb.

Sport1.az xəbər verir ki, komandanın baş məşqçisi Saşa İliç qarşılaşmadan sonra klubun mətbuat xidmətinə açıqlama verib və fərdi səhvlərin nəticəyə təsir göstərdiyini bildirib.

“Ötən dəfə də qeyd etdiyim kimi hazırlıq oyunlarında nəticə əsas deyil. Önəmli olan bütün oyunçuları iş başında görmək və müxtəlif taktiki gedişləri yoxlamaqdır. Bu gün də həm təcrübəli, həm də gənc futbolçuların oyununu gördük və həmçinin bir neçə taktiki gedişi sınadıq. Hələ də bəzi boşluqlarımızın olduğunu deməliyəm. Bu dəfə də fərdi səhvlər ucbatından qollar buraxdıq. Bütün bunların fərqindəyik. Səhvlərimizin aradan qaldırılması üçün çalışırıq. Qarşıda bir yoxlama oyunumuz qalıb. Ümid edirik ki hazırlıq prosesinin sonuna qədər qarşımıza qoyduğumuz bütün tapşırıqları icra edib, çempionatın ikinci yarısına tam hazır olacağıq”.

Qeyd edək ki, “Sumqayıt” Antalya toplanışındakı ilk yoxlama matçında Macarıstanın “Pakş” klubuna 1:5 hesabı ilə uduzub. Komanda Türkiyədə daha bir yoxlama oyunu keçirəcək və yanvarın 16-da Xorvatiyanın “Osiyek” klubu ilə qarşılaşacaq.