“Araz-Naxçıvan”ın futbolçusuna 1,3 milyon avro ödəniləcək
“Araz-Naxçıvan”ın yarımmüdafiəçisi Patrik Andradeyə məhkəmə qərarı ilə külli miqdarda ödəniş ediləcək.
Sport1.az xəbər verir ki, kabo-verdeli futbolçunun Serbiyanın “Partizan” klubu ilə yaşadığı hüquqi mübahisə yekunlaşıb. Andrade maaş öhdəliklərinin yerinə yetirilməməsi səbəbindən Belqrad təmsilçisini FİFA-ya şikayət etmişdi.
Məsələyə Beynəlxalq İdman Arbitraj Məhkəməsində (CAS) baxılıb və qərar futbolçunun xeyrinə çıxarılıb. Qərara əsasən, “Partizan” 32 yaşlı yarımmüdafiəçiyə 1,3 milyon avro məbləğində kompensasiya ödəməlidir.
Bu qərardan sonra Serbiya klubu üç transfer dövrü ərzində yeni futbolçu qeydiyyatdan keçirə bilməyəcək. Bununla belə, Belqrad təmsilçisi məsələ ilə bağlı yaydığı açıqlamada borcun qış fasiləsinə qədər ödənəcəyini və transfer qadağasının aradan qaldırılması üçün addımlar atılacağını bildirib.
Qeyd olunub ki, Andradeni “Partizan”a gətirən menecer də ona məxsus 270 min avronun ödənilməməsi ilə bağlı FİFA-ya müraciət edib.
Xatırladaq ki, Patrik Andrade 2022-ci ilin yayından 2023-cü ilin yayına qədər “Partizan”ın formasını geyinib. O, Serbiya klubunda keçirdiyi 26 oyunda 2 qolla yadda qalıb.
