Mbappenin PSJ ilə bağlı apellyasiya şikayəti rədd edildi
Paris Apellyasiya Məhkəməsi “Real”ın hücumçusu Kilian Mbappenin PSJ-nin hesablarının dondurulması ilə bağlı müraciətini rədd edib.
Sport1.az xəbər verir ki, bu barədə jurnalist Ben Ceykobs məlumat yayıb. Mbappe məhkəmədən Paris klubundan 55 milyon avro məbləğində bonusların, həmçinin 2024-cü ilin aprel–iyun ayları üzrə maaşının ödənilməsini tələb edirdi. PSJ isə futbolçunun bu məbləğlərdən “Real”a azad agent kimi keçidi ərəfəsində könüllü şəkildə imtina etdiyini iddia edir.
Məhkəmənin qərarına əsasən, Mbappenin iddiası əsassız sayılıb. Bundan əlavə, fransalı hücumçu məhkəmə xərclərini ödəməyə məcbur edilib və Paris təmsilçisinin xərclərinin kompensasiyası üçün 3 min avro cərimələnib.
PSJ-ni təmsil edən vəkil məsələ ilə bağlı bildirib ki, məhkəmə artıq ikinci dəfə Mbappenin klubun hesablarının dondurulması ilə bağlı tələbinin əsassız olduğunu təsdiqləyib. Onun sözlərinə görə, mübahisə hüquqi yox, daha çox etik və qarşılıqlı hörmət məsələsidir.
Qeyd edək ki, Mbappe daha əvvəl də PSJ-nin hesablarının dondurulması ilə bağlı qərar əldə etsə də, bu qərar may ayında ləğv olunmuşdu. Noyabrda futbolçu yenidən apellyasiya instansiyasına müraciət etmiş, dekabrın 9-da isə məhkəmə yekun olaraq Paris klubunun xeyrinə qərar çıxarmışdı.
